قصيدة : تل قلبي


قصيدة : تل قلبي



قصيدة : تل قلبي

أنا تل قلبي في الهوى كاملً بالزين

كـما تل كبتن طايره وقـت الاقـلاعي

نـتـقها من المدرج بخفه ورمشة عين

كما دقتك روس الاصابيع بسراعي

وانا خابرً قلبي مابين الضلوع مكين

ولاهو ركيكً في الهوى سهل ينزاعي

ولـكن زاد الكـيل وانهـد صـار وهين

جمالً طغا لو ينظر الضلع له ماعي

نواعيـسً جفـونه طوالً رموش العين

وادعـج بـلا ميـلً ولا ضـلً صناعي

ولون الورد الحمر تزها بها الخدين

ووجـهً كـما بدر اتسـق نور القاعي

وجيدً معنق تحت سود الخمار يبين

ولبه كما لـون الذهب نورها شاعي

مع كـل زيـنـه راجحً بالعقـل وذهين

وخفـه بـدمه مـيزة زيـن الاطباعي

وانا قبل شوفه دالهً في هوى السالين

وطاوي عن بحور الهوى لفة شراعي

وانا اكن لوعاتي بوسط الحشى تكنين

وتظهر علي ونه تكشّف خفى اوجاعي

وانا بطلب الله وصل زين الوصوف يحين

ويـرتاح قـلبً بـين الاضـلاع مـلـتاعي

كلمات الشاعر : عبدالله راشد الفرشان